هو دايما كدة اول لما بيكلمها بتبقى مش عارفة مالها بتبقى مجنونه جدا وهادية جدا وعاوزة تروحله اوى بس فى حاجه دايما بترجعها
اول حاجه بيقولهلها (ممكن اخطفك)
بتروح معاه اوووووى مع بلونتها اللى دايما مطيراها فى سماه الشكولاته .
وفجأة بتلاقى نفسها بعيدة عنه اووووى
وفى كلمة واحده لما بيلضم شفايفه بشفايفها بتلاقيها معاه على شط اسكندرية فى حضن حواريها سحباها عنيه الموج , وبشيطنه زوربا لمسه واحده منه بتخليها شبه فينوس وبترقص حافية على رمل اسكندرية.
ومع اول نقطه مطر بتلاقيها ف حضنه تحت سما باريس ماشين مع بعض ف شوارعها حاضنين بعض اووى ومغطيه نفسها بيه علشان تعرف يعنى ايه دفى .
هو فكيلها ضفايرها وشرايط المدرسة ,,
صحى جواها كل عرايس الحواديت صحى الملايكة والشياطين والعيال التايهه
خلى مطرالسما لونها
خلاها تتمرد ع تفاصيلها الساكنة
جرى النيل الراكد جواها وطلق عصافيره الملونه على كل شجرة فى جناين الحلم
ورسم بكرة احلى ..ملهوش حدود ومن غير فيونكات بنت خايفه
طلعها من الفيلم الابيض واسود فهمها ان السنيما الصامته حلوة بس صوت ضحكتها الفرحانه زى العيال الصغيرين وهو بيعديها شوارع السما أحلى
ودهشتها وهى بتلف ع فتارين السما تتفرج ع الأحلام وهى لسه بتتولد أمتع
.
.
بس انت ليه دايما بتمشى قبل متصحى القمر؟